Ticker

6/recent/ticker-posts

قياس، اختبار قدرات الجامعيين | +٩٠



بسم الله الرحمن الرحيم

مرحبًا، عدنا بعد انقطاع ٤ شهور عن التدوين و مجموعة من التدوينات المعلقة اللي تنتظرني أكملها..
حرصت أنهي التدوينة هذي بأبكر وقت أقدر عليه عشان يستفيد منها أكبر قدر ممكن من الأشخاص.

اختبار القدرات للجامعيين

هو اختبار مشابه جدًا لاختبار القدرات بعد الثانوي لكن فيه قسم إضافي أسئلة ذكاء مشابهة للألغاز اللي تكون في المجلات سابقًا بالإضافة للقسم التحليلي.

تتطلب الدراسات العليا (ما بعد الجامعية) قدرات ذهنية تمكن الطالب من اجتياز متطلبات المسارات الدراسية بغض النظر عن التخصص.
اختبار القدرات هو قياس موحد لجميع الطلاب الجامعيين ليكون معيارا عادلا ودقيقا للجميع مما يساعد الجهات التعليمية التي لديها برامج للدراسات العليا على اختيار الطلاب الأكثر قدرة ذهنيا على متابعة وتلبية متطلبات الدراسة في تلك الجهات.

بالنسبة لي رهبة الاختبار و صعوبته كانت أسهل بمراحل عن اختبار الثانوي
بسبب تجارب الناس من قبلي بالإضافة إلى إنه سبق وجربته في الثانوي ومب شي جديد كليًا علي.

لمعرفة المزيد عن الاختبار من هنا


متى أحتاج الاختبار؟
لو كنت بتقدم للدراسات العليا (ماجستير) - بعض البعثات الخارجية - البرامج العسكريه الجامعية - برامج الدبلوم.

كم أحتاج وقت تجهيز للاختبار؟
حسب المعلومات الموجوده عندك وسرعة تعلمك من أسبوعين إلى شهر، وممكن خلال أسبوع تدريب مكثف 🚀.

الاختبار ورقي أو محوسب؟ وايش الأسهل؟
الاختبار الورقي يعقد غالبًا مره وحده في السنه ويعلن عنه قبل فتره وعليه ضغط، المحوسب أغلب أوقات السنه يكون موجود يعني ما يمر أسبوع ما يكون فيه محوسب .. بالنسبة للأسهل ماعندي خلفية لكن اختبرت محوسب وبالنسبة لي أفضل بمراحل من الورقي و الوقت فيه مبارك أكثر ومرتب جدًا.

كيف أحجز للاختبار؟
الموقع يظهر لك أول الاختبار الورقي ولما كنت أدخل الموقع أحسب إن وقته فاتني للأسف، لكن صار فعلًا الاختبار المحوسب موجود طول السنه 😍 و أسرع لكم للحجز في الاختبار المحوسب من هنا تدخلون وتحجزون بعد ما تسجلون دخولكم بالموقع.
بعدها تختارون المكان الأقرب لكم ثم موعد الاختبار اليوم و بعدها التوقيت ثم باقي الاجراءات.
بعدها توصلكم فاتوره لو كان سداد أو دفع مباشر من الفيزا.


وقت الاختبار أقسامه وما إلى ذلك:
ماراح أضيع وقتكم بتكرار معلومات متوفرة في موقع قياس الرسمي، الوقت ساعتين ونص و الأقسام نفس ماهي مكتوبه بموقعهم يتكون الاختبار من خمسة أقسام: - لفظي. - كمّي. - التفكير الناقد. - الأشكال. - المنطق.
وبالنسبة للمحوسب تقدرون تطلعون مجرد ما تخلصون من الاختبار حتى لو ما انتهى نص الوقت .. نفس الشيء الانتقال من قسم لقسم تقدرون تنتقلون مباشره من تخلصون القسم حتى لو الوقت ما انتهى. 👍

مراجع مهمة للتدريب و التجهيز لاختبار القدرات الجامعيين:


  • تطبيق قياس القدرات للآيفون (للتحميل من هنا) فادني جدًا جدًا خصوصًا في اللفظي، ميزته معاك بكل وقت ومتى ما حصلت وقت فراغ ادخل وأحل مجموعة اسئلة ومرات كثيرة تتكرر علي وبكذا اعرف أتفادى أخطائي السابقة فيهم و تتكون عندي حصيلة لغوية منها.
  • قناة تليقرام تجميع قدرات جامعيين من هنا، فيها نماذج وأسئلة كثييييره مره من الصعب للسهل وتجميعات على سنوات متعددة .. حلو تطلعون على بعضها ع السريع خاصة جزء الأشكال.
  • تطبيق نون للآيفون (للتحميل من هنا) التطبيق مب مجاني بشكل كامل، استخدمت المجموعة المجانية فقط ميزته بعد كل سؤال يصعب لك اللي بعده ويكون في نهايته فيديو يشرح الطريقة أو المهارة المستخدمة.. التطبيق مررره مرتب وعملي، لو فيه غيرك بيختبر قياس للثانوي أو اختبارك بعد فترة طويلة يسوى تشتركون معهم. أما لو شيء مستعجل وموعد اختبارك قريب أحس فيه بدائل مجانية كثير.
  • من أهم المهارات في الاختبار هي التخمين الذكي للأسئلة اللي تحتار في اجابتها أو ما تعرفها.. من هنا فيديو يشرح كيف نستفيد من المهارة في الاختبار.


كم مره مسموح اختبر قدرات جامعيين؟
خمس مرات فقط للورقي و المحوسب سوا.

وش أحتاج يوم الاختبار معي؟
بالنسبة للاختبار المحوسب الحضور قبل الموعد بـ١٥ دقيقة على الأقل و أول ما توصلون المركز اللي اخترتوا تختبرون فيه تدخلين حتى لو قبل موعدك .. تسجلين بياناتك عند الموظفات و توقعين التعهد وبعدها إذا فيه شاغر تسألك بتدخلين بدري أو تنتظرين وقتك .. بالنسبة للبس ألبسوا أي شي مريح لكم، العباية بتفكونها قبل تدخلون والشنطه مع الساعة وأي شي رقمي والعباية بيحطونها لكم وسط لوكر خاص فيكم، ماتحتاجون قلم ولا أي شيء ..
بس المويه و الهوية الوطنية.. طبعًا بدون البطاقة ماراح تقدرون تختبرون أو تدخلون حتى..
و بالنسبة للنوت اللي تكتبون فيه المسوده والحلول وما إلى ذلك بيعطونكم لوح رقمي تكتبون عليه بالقلم معه، وإذا امتلت الصفحه أو بين سؤال وسؤال اضغطوا زر ديليت وراح تنمسح اللوحه وترجع جديده وهكذا.. مره سهل ومرتب.
ممنوع دخول الآلة الحاسبة، لازم تسترجعون المهارات الأساسية في الحساب مثل جدول الضرب و القسمة.
المكان داخل الاختبار مريح و التكييف ممتاز، يعني الجو يساعد على التركيز جدًا و الموظفات لطيفات جدًا و مبتسمات ومتفهمات.💕
و برا متوفر جلسات انتظار لو فيه مرافقات و جلسة انتظار للي بيختبرون و آلة ميد لو اختبارك مطول وتبين سناك بعد.


أقدر ألغي الاختبار أو يتم تأجيل موعده؟
نعم تقدر المهم قبل موعده بثلاث أيام على الأقل.

كم رسوم الاختبار؟ وكيف طريقة الدفع؟
رسوم الاختبار المحوسب: ٢٠٠ ريال و الدفع عن طريق سداد أو البطاقات الائتمانية، وبالنسبة للرصيد ممكن يتحول لحساب أحد آخر لو كان المبلغ المدفوع أعلى أو قررت إلغاء الاختبار.

متى تطلع نتائج الاختبار؟ وكم صلاحيته؟
تطلع مباشرة في الموقع بعد تقريبًا ٣ أسابيع حسب سرعة المركز في التصحيح، بالنسبة لاختباري استغرق تقريبًا أسبوع ونص بس.
صلاحية الاختبار خمس سنوات من تاريخ الاختبار.


إلى هنا وصلت إلى نهاية التدوينة، نصيحة لا تأجلونه خصوصًا لو هدفكم واضح بآخر سنة جامعية خذوه بأقرب فرصة ممكنه و طيحوا همه .. خصوصًا إنه مسموح تاخذونه بآخر سنه جامعية اللي هي سنة التخرج.
ومثله مثل أي اختبار بعد ما تحجز موعد الاختبار وتدفع راح تجبر نفسك إنك تذاكر وترتب جدولك ..
ولو ما جبت الدرجه من المره الأولى بيكون فيه فرصة ثانية لك و يكون معاك وقت قبل حاجتك للنتيجة

وتذكروا دايم إن هذا كله هو توفيق وتسخير من رب العالمين ♡..
أدعوا كثير و خلوا أهلكم يدعون لكم .. وثقوا برب العالمين إنه راح يتسهل أمر الاختبار.


وبالتوفيق جميعًا .. أي سؤال أنا في الخدمة

أي استفسار / تعليق / معلومة / نصيحة الكومنت هنا مفتوح أو هنا في صراحة


وبس والله



إرسال تعليق

7 تعليقات

  1. بسوم تعرفين احد طلعت نتيجة اختباره في يومين عمل ؟

    ردحذف
    الردود
    1. أهلًا هاجر، لا للأسف الأغلب تطلع أبكر وقت من ٤-٥ أيام

      حذف
  2. مرحبا
    فين أقدر ألقى آخر النماذج ، او نموذج يشبه للنموذج الي اختبرتيه لأن اختباري قريب ..
    ومرة شكراً على التدوينة وتدوينة الآيلتس أعتبرهم تدوينات بطططططلة 💕👌🏻

    ردحذف
    الردود
    1. أهلًا رانيا، آخر النماذج بتحصلينها في أول قناة تليقرام في المصادر وأهمها نموذج ١١ .. وبالتوفيق يارب في اختبارك الله ينولك الدرجة اللي تتمنينها وأحسن بعد .. شكرًا لك ع التعليق شجعني كثير وأبسطني 💕

      حذف
  3. شكرا عزيزتي بسمه جوزيتي خيرا على المعلومات القيمة جدا جدا والتي استفدت منها كثيرا، أردت سؤالك هل يمكنني العودة للصفحة السابقة في نفس القسم اذا اردت اعادة حلها او التأكد وهل يمكن أن اطلع على أسئلة القطعة وبعدها اقرأ القطة وليس العكس؟

    ردحذف
    الردود
    1. حياك الله وسعيدة بفائدتك، نعم تقدرين ترجعين لنفس القسم لكن ما ترجعين للقسم السابق اللي انتهيتي منه، نهاية كل قسم يظهر لك لو فيه سؤال تخطيتيه أو حابه تراجعينه وتعدلين إجابته

      حذف
  4. يا شباب مادري هل هو مشابه لاختبار قدرات المعلمين يعني فيه درجه إذا عديتها تعتبر اجتزت الاختبار او يختلف افيدوني بارك الله فيكم

    ردحذف

It's all about friendly conversation here ; I'd love to hear your thoughts and query ! Be sure to check back again because i do make every effort to reply to your comments here