تطوير كتابتك وتصحيح الأخطاء في اللغة الانجليزية | تطبيق Grammarly

مرحبًا أصدقاء مدونة بسومز،

التدوينة اليوم عن موقع/أداة/تطبيق جديد يساعدكم في تعلم اللغة الانجليزية

كنت محتارة بين موضوعين أكتبهم والتصويت لتدوينة قرامرلي غلب تدوينة الجيمات..

قبل ابدأ بالتدوينة، أنا مازلت أتعلم ولا زال عندي أخطاء كثير

لغويًا و في القواعد و الكلمات والنطق وطبيعي هالشيء محد بيكون فلته وفنان بوقت قصير وبدون تطوير

ولاحظت إن القرامر عندي تحسن وتركيب الجمل و الفواصل بعد ما استخدمت قرامرلي

ايش هو قرامرلي؟

خدمة تصحيح لغوي (إملاء/قواعد) متوفرة في أكثر من شكل كموقع و أداة في متصفح سفاري وكروم وكيبورد في الأجهزة الذكية! تقدم خدمة التصحيح سواء أمريكية/بريطانية/كندية/استراليه

تقدرون تحملون تطبيق قرامرلي من هنا [تحميل التطبيق]

* مجاني أو مدفوع؟

الخدمة مجانية لكن المميزات محدودة فقط تصحيح إملائي وبعض القواعد تتصحح، لكن لو حابين مزايا أكثر مثل تصحيح علامات الترقيم/كلمات بديلة للكلمات المكررة/ومميزات أكثر تشتركون معاهم و المبلغ أشوفه مناسب جدًا بالنسبة للعائد منها، أنا اشتركت معاهم كتجربة ٣ شهور بحكم عملي واحتياجي له كان عالي وحاليًا بأبدأ بالشهر الثالث معهم وراح أجدد الاشتراك.

نهاية التدوينة بأذكر بتفصيل أكثر عن الأسعار وأسهل عليكم المهمة بما إن كثير يتخوفون من الاشتراك بمثل كذا، لكن دايم أشوف أن أي مبلغ يروح على شيء بيعلمني ويطورني مستحيل أبخل فيه لأن بيجيب لي أكثر من اللي راح.

راح أتكلم عن كل شكل من أشكال قرامرلي و ايش فادني فيه:

* موقع قرامرلي [المستندات]:

تقدرون تدخلون موقع قرامرلي مباشرة من المتصفح باللاب توب وتستخدمونه كمستند، كأنه مايكروسفت وورد تكتبون كل الكلام أو تنسخون وتلصقون بعدها على اليمين موجوده التصحيحات و يطلع لك اقتراحات لتعديل الجملة، أو لما تتكرر نفس المفردة في النص ينبهك ويعطيك لها بدائل بالإضافة إلى الأخطاء الإملائية وعلامات الترقيم.

التصحيح أشبه بالكامل لكن مرات أكتب وأتعمد الخطأ بس يمشيها لكن يكون خطأ لغوي بسيط في تركيب الجملة ما يخل بالقرامر يعني، بس أشوفه جدًا مفيد.
فادني بتصحيح الرسائل الطويلة/التقارير، أيضًا وقت التدريب قبل اختبار الآيلتس كنت لما أخلص براكتس رايتنق أشيك في قرامرلي إذا تمام وأيش عندي أخطاء و متأكدة بيفيدني مستقبلًا بدراستي في البحوث والواجبات.

هنا صورة للمستند وكيف يكون التصحيح فيه:

على اليمين يظهر الأخطاء، أعدادها ونوعها .. بعدها يظهر لك الكلمة الخطأ وسبب الخطأ وشرح بسيط مثلًا بالصورة تكرار كلمة important أعطى فكرة لكلمة بديلة وسبب الخطأ .. واليسار هذا مكان النص اللي بتتأكد من سلامته

الأحمر خطأ إملائي/قاعدة و الأصفر خطأ تركيب جملة/لغوي/علامات ترقيم.

أكثر مشكلة كانت تواجهني في الكتابة هي أني أخلط أزمنة، القواعد صحيحة لكن نفس الجملة فيها ٣ أزمنة مثلًا مختلفة وقرامرلي ساعدني كثير من هالناحية ولاحظت تطور ملحوظ فيها بالإضافة إلى تراكيب الجمل عندي.

* أداة قرامرلي [متصفح سفاري و متصفح كروم]:

تقدرون تحملون الأداة [من هنا] عن طريق الدخول للرابط من المتصفح بعدها بيظهر لكم خيار التحميل ثم التثبيت
وراح تحصلونها بزاوية المتصفح .. فائدتها أنها سريعة وتصحح لك بأي نافذة كتابية
مثلًا الحين وأنا أكتب التدوينة لو كانت بالانجليزي فهو يصححها لي مباشرة بدون ما انسخ وألصق بالموقع
يدعم أغلب المواقع و صناديق النص ما عدا للأسف مستندات قوقل درايف لكن اللي فهمته من موقعهم إن الخدمة قريب راح تتوفر لمستندات قوقل.
ميزة الأداة سهولة التصحيح بنفس المكان إضافة لما تضغطونها راح يطلع لكم كذا:

- خيارات متنوعة مثل السماح لقرامرلي بالتصحيح للموقع الموجود فيه حاليًا.
- خيار نوع الانجليزية المستخدمة، بالنسبة لي استخدم الانجليزية الأمريكية.
- وأهم خيارين تسهل لك الوصول اللي هي إنشاء مستند جديد للتصحيح و الصفحة الرئيسية لمستنداتك.

* كيبورد قرامرلي للأجهزة الذكية:

الكيبورد يكون موجود في كل التطبيقات، فادني جدًا في التعامل المباشر وقت العمل/ في مراجعة كتابتي في تطبيقات السوشال ميديا و برامج المحادثة عمومًا.
أيضًا ميزة الكيبورد يتوقع الكلمة اللي راح تكتبها ويظهر لك اقتراحات بالكلمه المناسبة للجملة الحالية.
رائع جدًا حتى لو ما اشتركتوا وحصلتوا ع الميزة الكاملة، كون فيه كيبورد يصحح الخطأ/القرامر بيطور من لغتك كثير غير إنه يقلل من تعرضك للإحراج مع أني ضد هالشيء لأن محد يتعلم بدون ما يخطي.

طريقة تثبيت الكيبورد:

بعد ما تحملونه على الأجهزة الذكية راح يطلب منكم السماح الكامل للكيبورد .. تقدرون تحددون أنه ما يسمح له يجمع بياناتكم لكن بكذا راح تحدون من استخدامكم له

بالنسبة لي فاتحة السماح الكامل للكيبورد عشان أقدر استخدمه في تويتر في المحادثات الكتابية وأي مكان آخر
لكن انتبهوا لا تستخدمونه وقت تسجيل بيانات مثل تسجيل دخولكم بموقع / كلمة المرور / بيانات الفيزا

كحماية لخصوصيتكم فقط.

* مميزات إضافية أعجبتني:

من أكثر المميزات الحلوة واللي شجعتني أشترك اللي هي القائمة البريدية عندهم، أسبوعيًا يرسلون لك إيميل فيه إحصائية عن عدد الكلمات اللي استخدمتها، الأخطاء وكم نسبة الخطأ بالنسبة لبقية المستخدمين و كم نسبة الكلمات المميزة اللي كتبتها و آخر شيء يحطون لك أكثر ٣ أخطاء تكررت عندك لغويًا و في القواعد و أكثر ٣ كلمات تكتبها خطأ إملائيًا وهالشيء نبهني كثير غير التشجيع بكم أسبوع أنهيت وكم أنجزت و آخر الإيميل يحطون ٣ تدوينات مفيدة تطور من كتابتك يقترحونها عليك .. نادر يلفت انتباهي إيميل مجموعة بريدية لكن إيميلهم يفوز!

* الأسعار وطريقة الاشتراك:

اشتراكي كان بسبب إيميل وصلني [عرض لمدة يوم واحد] فاشتركت مباشرة لأني من زمان كنت محتاجته و العرض ذكرني بالاشتراك .. أخذت باقة ٣ شهور بمبلغ جدًا ممتاز أقل من ١٥٠ ريال .. وحاليًا أفكر أرقي الباقة إلى باقة سنه كاملة بس مازلت انتظر عرض قادم وفي حال مافيه عرض بأشترك بكل الأحوال لأني الصدق شفت منه فائدة ملحوظة.

هنا الأسعار الحالية، كل مازادت المدة يقل السعر الشهري لكن الدفع مره وحده:

بالنسبة للدفع متوفر عندهم أكثر من طريقة بالبطاقات الائتمانية والباي بال .. اشتركت معهم عن طريق الباي بال.
واللي فهمته إن التجديد التلقائي مفتوح تقدرون تلغونه من صفحة التحكم بالاشتراك أو عن طريق مراسلة الدعم.

إلى هنا انتهت تدويني..

أتمنى كانت مفيدة لكم و أضافت معلومة جديدة .. أنا كنت أعرف قرامرلي من زمان بس كل اللي أعرفه إنه يصحح النص وما كانت تجربتي معه في البداية مرضيه لكن الآن تطورت الخدمة كثير وتستحق ينكتب عنها ريفيو.

وفعلًا مفيده جدًا جدًا لكل أحد يتعلم/يستخدم اللغة و تكسب منها مهارة كتابية على شوي شوي بدون ما تحس.

أي استفسار / تعليق / معلومة / نصيحة الكومنت هنا مفتوح أو هنا في صراحة

وبس والله