Ticker

6/recent/ticker-posts

تجربتي مع اختبار الآيلتس (درجة 6.5) || IELTS EXAM



بسم الله الرحمن الرحيم

في فترة قصيرة (بداية نوفمبر) قررت آخذ اختبار الآيلتس وكان هدفي أقل درجة أحصل عليها 6
ما يحتاج أقولكم إنه جتني تعليقات كثير مثل "ماتاخذينها من أول اختبار" .. بس جبتها 😉
والحمدلله هذا بفضل ربي ثم فضل تشجيع أهلي وصاحباتي الفترة هذيك 

قبل بثلاث أسابيع بدأت أطلع على ايش هو الاختبار وأجهز نفسي حبة حبة
وراح أذكر المصادر اللي فادتني في هالتدوينة أسهل عليكم مهمة البحث

المذاكرة الفعلية كانت بس خلال أسبوعين سويت فيهم لي جدول بعد ما حددت مستواي

كيف بدأت؟

1- عرفت مستواي بشكل عام بالأنقلش.
2- اختبرت تجربة من كتاب ايلتس تبع كامبردج وعرفت الدرجة المبدئية. (من هنا التقييم)
3- شفت ايش الأقسام قويه فيها وايش ضعيفة.
4- الأسبوع الأول كثفت براكتس للأقسام الضعيفة وشوية وقت للقوية.
5- اختبرت ثانية وشفت فيه فرق أو لا ولاحظت انه فرق شيء بسيط ولا قدرت ارفع درجتي اكثر.
6- الأسبوع الثاني كثفت على الاقسام القوية عندي عشان ترتفع أكثر و شوي للضعيفة.

زبدة التجربة:

أنا كان مستواي بشكل عام متوسط وده يصير أدفانس 😂
اختبرت تجربة وصارت نتيجتي (قراءة 5 ، سماع 5.5 ، كتابة 5.5 ، تحدث 6).

* القراءة - Reading: 
أصعب قسم كان بالنسبة لي لأني ما أقرا في حياتي الواقعية مقالات أو أبحاث أكاديمية .. ماضيعت عليه وقت كثير لأن ماكان معي وقت أطور فيه مهارة القراءة بهذي السرعة لذلك بحثت عن التريكس والخطوات المهمة و طبقت (تكنيك حاد - هنا ) ورفعته لـ5.5

* السماع - Listening:
سويت براكتس كثير من يوتيوب راح ارفقها تحت وركزت على نقطة السبيلنق و الجمع والمفرد وكذا وصارت درجتي تتفاوت مابين 6 و 7 بالسكشن.
من الفقرات المهمة في الاستماع هي خريطة الاتجاهات (Map directions) تتكرر كثير في أغلب الاختبارات وحلو يتجهز لها الواحد من قبل وهي عبارة عن خريطة وتحدد الأماكن فيها بكذا طريقة ، (من هنا شرح)

* الكتابة - Writing:
قريت كثير عن التكنيكس والنماذج اللي تساعد بترتيب الأفكار إضافة إلى اني لخصتهم في ورقة عشان بكل مره قبل أكتب أقراهم ترتب أفكاري وكتبت جمل بشكل مبسط تساعد ، خصوصًا في المهمة الأولى تحليل المعلومات لأنهم يهتمون في المفردات الوصفية وتنوعها بعد ولازم تتدربون على كل الأنواع من الأشكال إلى الجداول إلى الخرائط والعمليات لو مجرد تاخذون فكرة.
زبدة قسم الكتابة على قد ما تكتب وتتدرب على قد ما بتتطور درجتك.
أخذت تقريبًا 9 كلاسات مع معلمين في كامبلي أرسل لهم كتابتي قبل الكلاس ويصححونها معاي وقته وجدًا فادني لدرجة آخر مره قيمتني معلمتي بدرجة 7!
طبعًا فيه بديل مجاني اللي هو موقع Grammarly أو writeandimprove ، بس الصدق ما استخدمتهم لأني وقتها كنت أحتاج توجيه مباشر على الأسلوب وترتيب الجمل أكثر من كونه تعليق على قرامر وسبيلنق.

* التحدث - Speaking:
طبعًا من قبل فادتني سواليفي مع معلمين كامبلي بس صرت أسوي معاهم براكتس لكل اقسام التحدث وكل مره يجيبون لي موضوع ومن حظي بعض الاسئلة تكررت علي بالاختبار وكنت وقتها واثقة من إجابتي بسبب اني جاوبتها من قبل وأفكاري ترتبت فيها (من هنا تجربة كامبلي وأسماء المعلمين)
أهم نقطة في التحدث هي الوقت والانطلاق مع الثقة ، يعني أغلب الأسئلة تتمحور حول رأيك عن موضوع معين أو نظرتك لقصة وما إلى ذلك وعادي بتضطر للكذب والتخريف لأن مب كل شيء يسألونك فعلا جربته بنفس الوقت لازم تعطيهم جواب متكامل وهم ماراح يعرفون إذا صدق أو كذب يهمهم تكون أحداث مترابطة و تجيب على كل الفقرات المذكورة.
أبرز التكنيكس المهمة اللي أخذتها من معلميني:
تاسك1: لازم تجاوب بجملتين على الأقل ، مثلا يسألونك تحب عائلتك؟ الجواب يكون نعم أحب عائلتي ولا أقدر أتخيل أعيش بدونهم. لأن العائلة دائمًا أساس الحياة. وغالبًا تكون أسئلة تاسك ون حلوه وخفيفة عشان كذا تعرف عليها قبل لأن بتعطيك الثقة والراحة لباقي مهام الاختبار.
تاسك2: لما يعطونك موضوع محدد تأكد إنك تجاوب كل الأسئلة المذكورة فيه ، إضافة إلى إنك تبدأ الجواب بنفس جملة السؤال ثم تذكر جوابك أو رأيك .. وإذا توهقت بفقرة كلامك عنها قصير خلي في بالك (What,When,Who,Why,Where) وبكذا كل فقرة ممكن يطلع منها تفاصيل أكثر. وأبدًا لا توقف قبل ما يوقفك اللي يختبرك.
بالنسبة لي كنت أشغل التايمر أول ما ابدا أتكلم لين قدرت أتجاوز نقطة إن كلامي ينتهي قبل ينتهي الوقت المطلوب وكانت مشكلتي أتكلم بسرعة فصرت أهدي من سرعة كلامي وأعطي نفسي الدقيقة الأولى لترتيب الأفكار كاملة.
تاسك3: يعطونك كم سؤال للنقاش مرات له علاقة بالتاسك السابق ومرات لا ، أهم نقطة أنك تعطيهم فكرتين على الأقل في إجابتك وتفصل كل فكرة فيهم.
بالنسبة للتقييم قيمتني معلمة في كامبلي 5.5 وضيقت صدري وفقدت ثقتي فجأة بما أنها كانت تقيّم في مركز ايلتس، بس اكتشفت إنها كانت تعطيني مهام وأسئلة صعبه (واللي ممكن تجي بس نسبتها ضئيلة) بينما كان المهم أني أسوي براكتس على المواضيع المتعارفة ، فصرت أسوي براكتس مع معلمين مختلفين والتقييم تفاوت بين 6 إلى 6.5 وبالإختبار أخذت الحمدلله 7.5

ايش الجدول اللي مشيتي عليه؟

ما أعتبر نفسي كثفت المذاكرة بالنسبة لأني ماعندي شغل وقتها غيره ، فيعني متأكده اللي بيعطي الموضوع وقت أكثر راح يقدر يبدع بدرجته في الاختبار حتى لو كان مستواه متوسط ، لأن مايهم المستوى قد كم بتعطي وقت للمذاكرة لأنه تكنيكس وتدريب أكثر من كونه يختبر لغتك فعليًا فيعني فيه أمل
الأسبوع الأول تهيئة أشوف فيديوز وعرفت الاختبار أكثر وبديت براكتس سبيكنق
الأسبوع الثاني كنت كل يوم أستلم قسم محدد وأسوي براكتس مرتين وغالبًا ياخذ ساعتين إلى ثلاث باليوم حسب القسم وصعوبته.
الأسبوع الثالث ركزت على الوقت أني أتم الحل بنفس الوقت المحدد خصوصًا الكتابة وركزت على الأقسام القوية عندي.

وين أخذتي الاختبار؟

أخذته في جامعة الفيصل مع idpIELTS ، سجلت من خلال الموقع الرسمي للآيلتس (من هنا)
فيه نوعين للاختبار حسب هدفك ، أخذت IELTS Academic
عبيت بياناتي بشكل صحيح ورفعت مرفق الهوية وحجزت موعد .. طبعًا الاماكن تختلف بحسب التواريخ
في اليوم اللي كنت أبيه كان متوفر بس مكانين جامعة الفيصل و المعهد البريطاني في السفارات
السعر كان بـ1100 ريال ، حجزت بالفيزا بس موجود خيار دفع بالمكتب
قبل الاختبار بأسبوع سووا سيمنار بالجامعة بس مارحت ، وقبله بيومين سووا محاضرة تعريفية عن الاختبار اون لاين ع ويبنر بس وقتها تأخر علي وماراح تفيدني بشي.
وفيه موقع تبع idp مره حلو يعطونك مجانًا قسم واحد تختاره فيه تعريف كامل للقسم وأمثله على اسئلته وبراكتس كيف تحلهم.

موعد صدور النتائج؟
تطلع النتيجة بعد 13 يوم ، تشوفها اون لاين أو تاخذ هارد كوبي من مقرهم بالجامعة

ملاحظات جانبية:

بما أن هالنقطة محد ذكرها وكنت ما أعرف عنها ، لكن الاختبار في جامعة الفيصل كان بعباية ، اللبس ماراح يبين فتلبسون اللي يريحكم إضافة لأنهم بياخذون لكم صورة قبل لا تدخلون القاعة عشان تنضاف للشهادة 😸
قبل تبدون الاختبار تأكدوا إنكم مرتاحين و شاربين وماكلين ونايمين زين ، اختبار السبيكنق مب شرط يكون بنفس اليوم ، الأفضل تجيبون معكم وجبة خفيفة لأن مب دايم الماشينز فيهم أكل زين 😂
الأدوات والورق وكل شي راح يقدم منهم حتى الموية والمناديل ، ممنوع تلبسون ساعة حتى لو ساعة يد عادية .. لا تجيبون معاكم بالشنطة شي مهم أو بطاقات مهمه ، بطاقة الاحوال او جواز السفر حسب ايش سجلتوا فيه طبعًا بيكون معاكم على طول ، لأن حتى الجوال يتقفل وينحط بالشنطة في غرفة ومحد مسؤول عن الضياع.
طبعًا الاختبار كتبوا يبدأ 8 لكن فعليًا من قبل ثمان لحد 9 كان تسجيل وتحقق من بيانات وإجراءات دخول يعني.

مصادر فادتني:


دليلك للآيلتس
يوتيوب - تويتر - سناب - انستقرام
غني عن التعريف ماشاء الله تبارك الله ، حرفيًا كل شيء كان موجود عنده إضافة إلى أنه كنت أتابعه بشكل يومي تويتر وسناب وزاد من حصيلة الفوكابلري غير إنه يحفز للمذاكرة ويعرض طرق كثيرة تساعد.

IELTS EXAM
الموقع بشكل عام رائع ، أكثر شيء استفدت منه براكتس الرايتنق في تاسك1 فيه أمثله كثيره مع الإجابات النموذجية

IELTSbuddy
الموقع مليان براكتس ، ما أعطيته وقته حقيقه لأن ماكان عندي وقت كافي له بس رهيب ، أكثر شي استفدت منه هو الـidioms أخذت 5 منه حفظتهم كويس وبكل مره اسوي براكتس سبيكنق استخدم بس وحده منهم الأنسب للموضوع اللي أحكي عنه وهي:
- an arm and a leg
- over the moon
- piece of cake
- found my feet
- Practice makes perfect

IELTS listening  - Cambridge
كامبردج عندهم أجزاء كثيره من كتب كلها براكتس اختبارات كل كتاب يحتوي على 4 اختبارات ، طبعًا إذا كنتم من النوع اللي يقدر يذاكر بدون نسخة ورقية هذي القناة كويسة فيها كل الاختبارات اللي تخص السماع ، ومشابهة 100% للاختبار الحقيقي.

Cambly
كامبلي استفدت منهم في السبيكنق وتجربتي معهم (هنا) ، حاليًا عندهم عروض قوية جدًا لنهاية السنة تقدرون تسجلون وتستخدمون كودي ibasoom وبيجيكم دقايق مجانية تجربون فيها قبل الاشتراك .. من أول وهم معطيني ثقة في التحدث بس فعليًا فادوني كثير ، وإذا ماعندك الإمكانية للإشتراك فيه بديل وكنت أسويه بعد ما انتهي من الكلاس ، أسجل صوتي بالجوال و اسأل نفسي السؤال وأجاوب وقدامي المؤقت و بعد ما انتهي من كل بارت أسمع التسجيل وانتبه ايش عندي شيء غريب .. صح يجهزكم بس فعليًا ما يكسر الخوف مثل التحدث مع شخص نيتف ومن أهل اللغة ، نص ساعة مرة واحده بتكفي تقيس فيها أداءك على الأقل
النقطة الثانية استخدمتها للكتابة ، صح ياخذون مني وقت لانهم يصححون ويقرون وأنا ع الخط وتضيع علي دقائق بس كنت استفيد من ملاحظاتهم واعطوني ايش نقاط القوة و نقاط الضعف في كتاباتي ..

IELTS - Cambridge 
كتب كامبردج حكيت عنها من قبل ، حملت أون لاين إصدار 6-8 وسويت من كل واحد اختبارين إلى ثلاثه ، في الرابط موجود كذا نسخه .. ولو بحثتوا اتوقع راح تحصلون البقية بعد

IELTS Listening - practice
موقع سويت منه اختبارين للسماع ، متنوع ومليان نماذج كثيرة للتدريب

المدونة مبسطة أقسام الاختبار بتيبس وتريكس حلوين

Cambridge IELTS Trainer
الكتاب الورقي الوحيد اللي ذاكرت منه ، الجميل إن فيه خطوات و تعريف عن الآيلتس .. حلو في القراءة و السماع و السيكنق .. أما الكتابة كان مصعب المهمة قليلًا ، يعني أحس المواقع أسهل .. ما جربت أحمل النسخة الرقمية ولا اعرف إذا مجانية أو لا بس حصلتها متوفره لما بحثت في قوقل هنا


إلى هنا وصلت لنهاية التدوينة ، صدقوني البداية فقط صعبه 
بس بعد ما تحجز موعد الاختبار راح تجبر نفسك إنك تذاكر وترتب جدولك .. 
و الشغله اللي ترتب لك المذاكرة يكون عندك كاليندر أو بلانر ترتب فيه الايام
و تجزء كل مهمة إلى مهمة صغيره و بتنجزونها صدقوني ❤

والأهم من هذا كله هو توفيق وتسخير من رب العالمين .. 
أدعوا كثير و خلوا أهلكم يدعون لكم .. وثقوا برب العالمين إنه راح يتسهل أمر الاختبار و رددوا "اللهم سخر لي خلق من خلقك و جند من جندك ، ربي اشرح لي صدري ويسر لي أمري وأحلل عقدة من لساني يقفهوا قولي"

وبالتوفيق جميعًا .. أي سؤال أنا في الخدمة
أي استفسار / تعليق / معلومة / نصيحة الكومنت هنا مفتوح أو هنا في صراحة

وبس والله

إرسال تعليق

20 تعليقات

  1. ماااااشاء الله عليك وربي يبارك في علمك تدوينة جميلة وملهمة وعجبني حماسك ماشاء الله و تحمست من تجربتك ، أعتبر الأيلتس أفضل طريقة تثبت فيها لغتك .

    ردحذف
    الردود
    1. الله يسعدك و يبارك فيك رحاب ، شكرًا ردّك شجعني و أبسطني كثييير ♥️

      حذف
  2. ماشاء الله تبارك الله ، تجربة قوية بالنسبة للوقت ..
    حبيت اسألك اذا ساعة اليد ممنوعة كيف اقدر اعرف تقسيم الوقت وانا في الاختبار بالنسبة للكتابة
    يعني ٢٠ دقيقه لتاسك ١ و٤٠ لتاسك ٢ ؟
    ونفس الشيء للقراءة لان تدربت ولاقدرت اتجاوز مسألة الوقت دايم البارت الثالث احله ع السريع وعشوائي ..
    وفعلاً دليلك للأيلتس له فضل كبييير بعد الله في دراستي للأيلتس ، متابعتي له كونت لي أساس لكل قسم أمشي عليه .

    سؤال جانبي :) وش سويتي بجوالك ؟ أزمة صراحة اذا ماعندهم لوكرات

    ردحذف
    الردود
    1. شكرًا لك 😍
      بالنسبة لتقسيم الوقت في الشاشة قدامك قبل كل سكشن يعرضون التعليمات وبعدها تبدأ تشتغل الساعة و تعد لك تنازلي حسب القسم
      بالنسبة للكتابة الوقت كامل لك ٦٠ دقيقة ولَك الحرية بأي قسم تبدأ .. التقسيم المتعارف عليه هو ٢٠ تاسك١ ٤٠ تاسك٢ و بالنهاية حسب كل تاسك كم يأخذ منك وقت البراكتس .. لكن تركيزك بكون ع تاسك٢ لان درجاته أكثر.

      القراءة اذا مستواك متوسط ٢٠ دقيقة لكل قطعة حتى لو ما كفى الوقت للأخيرة ، يعني اخر قطعة فيه كذا سؤال ماحصلت الجواب و حليت بالتخمين لان انتهى الوقت علي

      جوالي قفلته و حطيته بالشنطة و أستودعته ربي 😂
      شنطتا كانت بالغرفة اللي انتظرنا فيها فأنت خليها معاهم و الله الحافظ 🙌🏼

      بالتوفيق يارب و الله ينولك الدرجة اللي تبينها و أحسن 💕

      حذف
  3. كامبلي عندهم عروض حاليا باقة سنه كامله ب 1200 بدل مكانت 2400
    باقة نص ساعه ايش رايك فيها

    ردحذف
    الردود
    1. باقة النص ساعة كافية جدًا لبراكتس السبيكنق سواء ٣-٥-٧ ايام بالاسبوع ، بس لو كان دروس تعليمية و قرامر و أيام أقل بالاسبوع يبي لها ساعة كاملة.

      حذف
  4. معليش بس ممكن اسئل انا منقبه راح يطلبو افك النقاب ؟

    ردحذف
    الردود
    1. قصدك وقت الاختبار؟ لازم تفكين النقاب عشان يتأكدون إنك نفس الشخص اللي بيختبر.. أما بالنسبة للشهادة الصورة تكون محجبة، تقدرين تتواصلين معهم تتأكدين إذا هو إلزامي أو لا

      حذف
  5. امتحان speaking كان في نفس اليوم ولا يوم تاني ؟

    ردحذف
    الردود
    1. كان بنفس اليوم بالنسبة لي، لكن مب شرط يكون دايم كذا ممكن قبل الاختبار بيوم وممكن بعده

      حذف
  6. اليلام عايكم .. اشكرج على التدوينة استفدت منها .. بس عندي سؤال .. انا مستواي بالانجليزي ميح يعني مبتدأة جدا .. والمطلوب لتخصصي درجة 5 .. اكثر شي خايفة منه التحدث خاصة اني ماعرف اتكلم واتأتأ احس اني محبطة :( ودي اعرف رايج وهل ممكن اني اجيب الدرجة ؟ ومشكورة لان اساسا ماعندي اي فكرة عن الايلتس وقاعدة اسوي سيرج وشكرا ..

    ردحذف
  7. وعليكم السلام، سعيدة باستفادتك ..
    كثفي البراكتس للسبيكنق يوميًا على الأقل شهر وإن شاء الله راح تلاحظين تحسن ..
    كثفي براكتس بأسئلة السبيكنق للايلتس تجهزي لها اكتبي اجاباتك و اقريها وتدربي عليها كم مره حتى يكون عندك حصيلة بما إن لغتك ما تساعدك ..

    البراكتس اليومي بيفيد سواء مع كامبلي نفس طريقتي أو مع أحد بالبيت عندك لكن الأفضل لغته الأم انجليزية .. مافي شيء بعيد ولو بذلتي الجهد وأعطيتي الوقت إن شاء الله بتجيبينها ..
    موجود في يوتيوب من نفس المعهد البريطاني تجارب مصورة و تقدرين تشيكين اللي اخذوا درجة ٥ في السبيكنق كيف يحكون وتقارنينهم بطريقتك وبكذا تقدرين تعرفين إذا ممكن أو لا

    ردحذف
  8. السلام عليكم ، كم جبتي درجة في كل قسم

    ردحذف
    الردود
    1. وعليكم السلام، ذكرت بالتدوينة درجتي بكل قسم

      حذف
  9. السلام عليكم بسمة

    شكرا لك على مدونتك الرائعة وشكراً على التدوينة المفيدة جداً..

    سؤالي هو أنا بكمل دراسة الماجستير هل يفرق اذا اخذت الايلتس عام أو اكاديمي؟ علماً ان ودي بالعام لأنه أسهل..

    ردحذف
    الردود
    1. وعليكم السلام،
      شكرًا لك أبسطني تعليقك جدًا..
      اللي أعرفه الماجستير بكل الجامعات يتطلب أكاديمي، عشان جزء الرايتنق

      حذف
  10. كم جبتي درجة بكل مهارة؟

    ردحذف
  11. أهلا" بسمة ،

    شكراً على افادتك لنا
    لكن لدي سؤال ، (بأي مبنى ودور) كان الإختبار في جامعة الفيصل لأن لم يصلني أية معلومات عن المكان داخل الجامعة .

    أرجوا افادتي ولكِ جزيل الشكر

    ردحذف
  12. بالنسبة لكامبلي
    تقدر تحدد لهم هدف اختبار الايلتس قبل التسجيل ؟ او اذا بداءت المحادثات تطلب منهم المساعدة والتقييم؟

    ردحذف
  13. يعطيك الف عافيه على الموضوع
    انا نفس الشي كانو يقولون ما تقدر تجيب 6 من اول مره
    وامس طلعت النتايج ودرجتي 6.5 الحمدلله

    ردحذف

It's all about friendly conversation here ; I'd love to hear your thoughts and query ! Be sure to check back again because i do make every effort to reply to your comments here