Ticker

6/recent/ticker-posts

5 نصائح للدراسة



مرحبًا ..
صحيح أني تخرجت لكن لا بأس أشارككم بشيء للدراسة وإلا 😏
حاولت أختصرها و أبسطها قد ما أقدر عشان تكون خفيفة ، الصدق ماكنت أطبقها كلها .. بس حاولت يعني
وأبي لكم الخير فأنتم دوركم عاد طبقوها 😂

5 نصائح دراسية/


1- اشتري أدواتك المدرسية بعد أول أسبوع:

كثير ياخذهم الحماس للدراسة ويشترون بوست نوت و دفاتر أشكال كثيرة و أقلام و كراسات بالنهاية نصها ما تستخدم و تنطلب منكم أشياء مختلفة.
لذلك بداية أول و ثاني أسبوع دفتر بالكثير كشكول لكل المواد و كم قلم أساسي.
بعدها حسب احتياج كل مادة و ايش تطلب منك معلمتها تجيبين المناسب لها ، بكذا تحافظين على فلوسك وبنفس الوقت تستثمرينها بشي فعلًا عملي ومريح لك ومناسب للمادة.

2- قسّم المهام الشهرية إلى يومية:


البعض تكون طاقته عالية بداية الترم و يجيب كل حيله مره وحده يبدأ بكل المشاريع بنفس الوقت و تحضر لكل الدروس وتراجعها ومن هالحكي وما تكمل 3 أسابيع إلا طاقتها انحرقت وزين إذا انحل الهوموورك أصلًا.
حتى تقدرين تنجزين المهام الأساسية خصوصًا المشاريع قسميها إلى مهام يومية ، أو أسبوعية .. بحيث تصغر المهمة ويسهل تنفيذها ولا تاخذ من وقتك كثير !

3- سجّل ملاحظاتك وأسئلتك أول بأول:


النصيحة هذي من الدراسة للشغل للهوايات ، أول ماتجي فكرة أو ملاحظة أو تساؤل مباشرة دونيه .. مب لازم على ورق أو بدفتر ، عادي التدوين يكون حتى بنوت الجوال أو الريمايندر لما تنقلينه لمكانه الصح.
وقت المحاضرة ماقدرتي تسألين أو تقطعين الدرس سجليه على طول على الملزمة مباشرة ، حتى لو وقت المذاكرة للاختبار وتشوفين أنه متأخر توك تستوعبين أن عندك تساؤل سجليه و اسألي بالايميل أو أي وسيلة تواصل أخرى أو حتى بعد الاختبار تتفادينها للفاينال مثلًا أو الميدتيرم.
حتى لو السؤال شخصي لك ، سجليه وابحثي بعدين بأي وقت فراغ لو إن شاء الله بطريق الدوام.

4- ابدأ بتخطيط المشاريع من بداية الترم:


إذا كنت تبين مشروعك يكون مميز لازم فكرته من البداية تكون مميزة ، ما أقول ابدي تنفيذ فعلي من بداية الترم لأن أغلب المشاريع ما تكون واضحة معاييرها أو حتى طريقتها من أول شهر.
لكن اسألي اللي أخذوا المادة قبلك كيف كان مشروعهم ، خذي نسخة منه شوفي وين أخطاءهم حتى تتفادينها ، ايش ركزت الاستاذة عليه بالتقييم .. وابدي عصف ذهني لحالك أو مع القروب للفكرة الأساسية.
لأن نص هم المشروع هو الفكرة و البداية ، إذا خططتي لها كويس خلاص بعدها سهل يتقسم الشغل و تسوين جزئيتك متى ماتبين أو حتى ترتبون بينكم الموضوع.

5- شارك في الأنشطة وتطوع في الفعاليات:


أوهووو هذي النقطة بحر ولو أتكلم عنها ماراح أخلص ويبي لها تدوينة لو حابين أحكي تجربتي علموني.
ثلاث أرباع شغلك على السيرة الذاتية قبل التخرج يعتمد عليها ، لأن المعدل ما يوكل عيش لحاله (إلا في حالات نادرة جدًا)
بالإضافة إلى اكتساب مهارات كثيرة للحياة العملية و المهنية ما تكتسبها من مجرد الدراسة والمذاكرة !
مثل: إدارة المخاطر ، العلاقات العامة ، التواصل ، العمل الجماعي ، الإدارة ، التخطيط ، حس المبادرة وما إلى ذلك.

حقيقي اللي تدخل المدرسة وتطلع منها بدون ما تشارك لو مرة بنشاط لا صفي ضيعت على نفسها فرصة حلوة تثبت نفسها فيها بالجامعة ، واللي تدخل الجامعة وتطلع وهي ماجربت لو حتى تشارك كتطوع في تنظيم حدث فهي ما استفادت من الجامعة 70% إذا ما كان أكثر !

بدل الوقت اللي يضيع انتظار ببريك ساعة أو أكثر بين المحاضرات استغليه ، الوقت اللي يضيع الصباح لأنك توصلين بدري استغليه و حتى الوقت اللي يضيع بعد ما ينتهي دوامك ولا تقدرين تطلعين استغليه .. عاد لو ماعندك وقت ضايع اصنعي لك ماراح يضرك شي أبدًا 😂

لو فكرتي إنه يروح منك 3 أيام أوف بالترم تداومينها عشان مقابلها تكسبين 3 شهادات لدورات مختلفة تثري معلوماتك و السيرة الذاتية حقتك راح تستسخفين إنك مستثقلة الدوام بالأوف وقتها .. لما توصلين ترم التدريب و تبدين بالسيرة الذاتية مبدئيًا و تستوعبين أنها تقرقع وفاضية و فجأة كل السيرة الذاتية تكون معبيه بخبرات بترم واحد وتاريخ واحد بيضعف من قيمتها لأن بيعرفون إنك اخذتيها تعبين فيها السيرة فقط و لا اكتسبتي منها مهارات وخبرة حقيقية.
فـ هذي أكبر و أقوى فرصة لكم و تفتح فرص أخرى لا تفوتونها أبدًا كفاية مجانًا وجاية لين عندكم بنفس مكان دوامكم 😉.



بكذا انتهيت من النصائح ، أتمنى أضفت لأحد منكم شيء جديد
ألهتمه بشيء أو حتى ذكرته .. لا تنسون أن تعليقاتكم تبسطني جدًا وتحمسني دايم
سواء هنا أو في الانستقرام أو تويتر أو صراحة 💖.

وبس والله.

إرسال تعليق

0 تعليقات